Hindi transcript

Shri Raghav Chadha ji. Sir jisne dekhi ho doobti

hui kashti, use umeed hoti hai kinaron se, aur

jisne dekha ho patjhad, use umeed hoti hai baharon

se. Sir aaj aapka swagat karte hue aisa mehsoos

ho raha hai ki ek lambe andhiyare ke baad aaj

chamakta hua suraj nikla ho. Aisa mehsoos ho

raha hai ki majhdhar mein phasi kisi kashti

ko aaj kinara nazar aaya ho aur chilchilati

garmi ke baad aaj jamke sawan barsa ho. Sir

yeh sirf sanyog hai ya ishwar ki iccha ki aaj

Rajya Sabha ki aitihasik deewar par do naam

saath-saath gadhe ja chuke hain. Pehla naam,

desh ke pehle Up-Rashtrapati aur Rajya Sabha

ke pehle Sabhapati Dr. Sarvepalli Radhakrishnan,

aur doosra naam aaj is pad par virajman hue

mananiya C.P. Radhakrishnan. Sir dhanya hain

woh mata-pita jinhone aapke andar Dr. Sarvepalli

Radhakrishnan ka aks dekha aur aapka naam unke

naam par rakh diya, aur dhanya hain aap ki aapne

apne mata-pita ka woh sapna saakar kiya. Is

pavitra sadan ka ek sundar chakra poora hua.

Aapse jo log rajnaitik ya vaicharik matbhed

rakhte hain, woh bhi batate hain ki aap matbhed

ko kabhi manbhed mein nahi tabdeel hone dete

hain, aur isiliye shayad aapko Ajatshatru ke

naam se bhi jana jata hai. Sir dhanya hai Tirupur

ki woh mitti jo aaj garv se mehak rahi hogi,

jis mitti ki god mein aap janme, pale-badhe

aur apni mehnat, samarpan, sangharsh, junoon

aur lokseva ke dam par aaj is pad par pahunche.

Sir aap jabse is pad par aasin hue hain, hum

sab yeh umeed lagaye baithe hain ki Dr. Sarvepalli

Radhakrishnan ki parampara aur netritva phir

se is sadan mein lautega. Sir Dr. Radhakrishnan

kaha karte the, "Parliament is not a legislative

body but a deliberative body." Yani ki yahan

charcha, vichar-vimarsh ka mandir hai. Woh kaha

karte the, "I belong to no party, that means

I belong to all the parties." Unhone apni nishpakshata

apne karyakaal mein, apne conduct se desh ke

saamne poori tarike se zahir kari. Aur Sir Pandit

Jawaharlal Nehru, Dr. Radhakrishnan ki karyashaili

ko dekhkar kaha karte the, and I quote, "The

way in which Dr. Radhakrishnan conducted the

proceedings of the Rajya Sabha, he made the

meetings of the House look like family gatherings."

Unhone is Rajya Sabha ki tamam karwai ko ek

parivarik baithak mein badal diya. Itne acche

mahaul mein unhone sadan ka sanchalan kiya.

Sir hum umeed karte hain ki Rajya Sabha, which

is one big family, aap bhi iska sanchalan usi

bhaav se, usi sneh se karenge. Aur Sir is parivar

ka youngest member hone ke naate main umeed

karta hoon ki shayad aap mujhe bolne ka mauka

auron se thoda zyada denge. Sir ant mein main

bas itna kehna chahta hoon ki kuch log hote

hain jo pad ki wajah se pehchane jate hain,

aur kuch log aise bhi hote hain jo pad ko pehchan

dekar chale jate hain. Main umeed karta hoon

Sir ki aapka karyakaal aisa ho ki jab itihas

likha jaye to Up-Rashtrapati ka pad aapke karyakaal

se jana jaye. Bahut-bahut shukriya and wish

you all the very best.