Arabic transcript
اليوم إسرائيل قررت تعمل مجزرة بالمدنيين، قررت إنها تعمل مجازر متنقلة عن سابق
إصرار وتصميم. إسرائيل قررت اليوم إنها تستعرض قوتها، قررت ترهب كل
اللبنانيين، قررت تضعف كل اللبنانيين،
إنه ما بدكم تسلموا سلاحكم لحزب الله، إي شوفوا شو حيصير فيكم.
اليوم لا بدنا ولا هو وقت نقول الحق على
مين وكيف وليش. تنفلق إيران على إسرائيل على أميركا على ترامب،
ينفلقوا، ينفلقوا. بس نحن عنا سؤال،
ليه نحن متروكين هيك؟ ليه نحن متروكين هيك؟ هي الدولة وهي
السلطة وينها؟ أنا كلبناني اليوم ليه ما عندي حدا بالسلطة يقل لي الاتفاق شملني
كلبنان أو لأ؟ أنا ليه بدي أنطر متل اليتيم أركض ورا الباكستاني وورا الأميركاني وورا
الإسرائيلي لأعرف إذا هالاتفاق شملني أو لأ؟ ليه ما في حدا بالدولة قل لي
هالاتفاق ما شملني؟ ليه ما حدا قل لي انتبهوا الاتفاق ما شملكم ويمكن إسرائيل تجن
وتوقع الدني ع رؤوسنا؟ وين رؤساء هالدولة؟ ليه ما في حدا منهم يقلنا إذا
هالاتفاق شملنا أو لأ ويشرحلنا شو عم بيصير؟ في أكتر من 90 شهيد لهلأ يا الله،
في مئات الجرحى. نبيه بري عم بيقلنا الاتفاق شملنا، طب إذا شملنا ليه
عم بيصير فينا هيك؟ وبعد ما صار فينا هيك، ليه الرؤساء التلاتة منهم مجتمعين
ومستنفرين بهيدي اللحظة ليأخدوا موقف واحد وموحد للي عم بيصير؟
شو ما كان هالموقف الموحد، خدوه وخلصونا. خدوا موقف واحد وموحد شو ما كان يكون،
مع إيران، مع إسرائيل، مع السلم، مع الحرب، مع الحياد. لك خدوا موقف موحد،
حسسونا إنكم على قد
1% من هالمصيبة. بس عفواً يعني نحن ما زقفنا نص ساعة على خطاب
القسم لبالآخر يحكينا رئيس الجمهورية عن القسطة، سوري ما زقفنا كرمال هيك.
إلك سنة ونص، إله سنة ونص رئيس الجمهورية بيقول بدي
أعمل وبدي أعمل بس مش هلأ ومش وقتها، طيب وبعدين؟ شفت وين صرنا؟
رئيس مجلس النواب خليه يفهمنا شو موقفه. من أول الحرب ما
منعرف شي عن موقف الرئيس نبيه بري. يقال إنه هو مخذول من حزب الله،
طب مخذول أو إنت مع اللي عم بيصير، حدا يفهمنا.
رئيس الحكومة بياخد مواقف وما قادر ينفذها لأنه ما حدا معه. طب ليه إنتو هلأ منكم
بحالة طوارئ؟ يا بتاخدوا موقف موحد باسم لبنان يا استقيلوا.
في 90 شهيد لهلأ، لهلأ ما بعرف قديه في تحت الأنقاض، في مئات الجرحى، في أطفال ميتة،
في أطفال عم بتدور على أهلها. كيف تاركينا هيك؟ يا عمي معقول نحن
نطرنا أفيخاي يقلنا شو صار بعين سعادة؟ معقول ما في كان لا جيش لا وزارة داخلية
لا قوى أمنية يخبرونا شو القصة؟ وبعدنا لهلأ مش فهمانين شو صار.
طب ممكن من فضلكم حدا منكم يتكرم ويخبرنا شو الوضع اليوم بالزبط؟ هلأ شو اللي عم بيصير؟
ليه عم بيصير هيك؟ نحن بالاتفاق أو لأ؟ طب هل هيدا اليوم بس
وبتبلش بكرا الهدنة وهني عم بيصعدوا كرمال الهدنة؟ أو هيدا المشهد هيك صار وبيروت صارت
خلص بقلب الحدث صارت هدف يومي؟ طب شو بالنسبة للأشرفية والصيفي
والدورة والضبية؟ كيف بدنا نعرف شو في الواحد يعمل، يقول؟
شو في الواحد أصلاً يقول؟ شو فينا نقول أصلاً؟ شو فينا نقول؟ شو فينا نحس؟
اليوم ما عنا شي نقوله، ولا عنا لا تحليل ولا يمكن أصلاً في ضرورة بعد لتحليل.
اليوم ما في حلقة، ما عنا موقف، أكيد مش وقت ننتقد حدا،
أكيد هو وقت بس لنقول للدولة اعملي شي،
عم نموت، عم ننباد. الكلمة الوحيدة اللي طلعنا نقولها
بحلقة اليوم
هي الرحمة للشهداء
والرحمة لإلنا كلنا.
End of transcript · 537 words
