Investigating Media Manipulation in Syria

السلام عليكم.

تحقيقنا لليوم بيحكي عن كيف أصحاب النفوذ بيستعملوا الإعلام ووسائل

التواصل الاجتماعي ليلمعوا صورتهم.

Reputation Management أو إدارة السمعة بالعربي بتتطلب وضع خطة علاقات

عامة وتشكيل فريق.

فريق بيدرس شو الناس بتحكي عنك، شو الاتهامات الموجهة إلك،

مين معك ومين ضدك، وكيف ممكن تعيد تقديم حالك بصورة مختلفة،

وتكذب كل الاتهامات الموجهة إلك بنفس الوقت.

تخيلوا إنه توع بإيديكم خطة علاقات عامة لشخصية سورية معروفة، وتبلشوا

تبحثوا عن الشخص اللي وراها، وفجأة تلاقوا حالكم أمام قضية

تجسس دولية.

خلوني أخبركم كيف بلشت القصة. بتاريخ 12 حزيران

2026، نشر موقع سوريا 360 مقالة بعنوان

"إعلامي يكشف عن حملة بتمويل ضخم لتلميع صورة محمد

حمشو".

المقالة نقلت عن الإعلامي محمد الفتال إنه بعد سقوط النظام الأسد تواصل

معه شخص وعرض عليه فرصة عمل.

الوظيفة كانت إدارة حملة علاقات عامة لصالح رجل الأعمال محمد حمشو.

وبحسب الفتال، كان في فريق متخصص مجهز خطة عمل

كاملة لإعادة تقديم حمشو للرأي العام السوري.

بما إنه الإعلام لعبتنا، قررنا نتحرى عن الموضوع،

واكتشفنا إنه الفرصة العمل هاي انعرضت على تلات أشخاص غير الفتال.

تواصلنا معهم كلهم وعطونا تفصيلين مهمين.

واحد: الشخص اللي تواصل معهم ليشغلهم على حملة

محمد حمشو

اسمه أويس.

اثنين: كان عم يحكي بلهجة فلسطينية.

حصلنا على الملف اللي كان عم يبعته أويس، تلات صفحات PDF بعنوان بسيط

جدًا، "خطة العلاقات العامة".

فتحنا الملف وبلشنا نقرأ. جمع المعلومات السلبية والإشاعات

المنتشرة عن محمد حمشو وتحديد مصادرها وتحليلها.

تقسيم الجمهور إلى داعمين ومحايدين ومعارضين.

بناء صورة إيجابية كفاعل خير وداعم للأهداف الوطنية.

بعدين نوصل لواحدة من أهم الجمل بالوثيقة.

التركيز على إنه محمد حمشو داعم للثورة من خلف الكواليس لأسباب

استراتيجية.

إبراز أعماله الخيرية. تخصيص فريق لرصد الشائعات والرد

عليها بشكل سريع وفعال. الاستفادة من الشخصيات

المؤثرة للدفاع عنه.

طبعًا ما حنذكركم من الشخصيات المؤثرة لأنه كلنا سنون نعرفهن

منيح. الوثيقة كانت عبارة عن خطة مفصلة لإعادة

تدوير صورة محمد

حمشو بعد سقوط الأسد.

وهون صار عنا سؤال.

مين هاد أويس اللي بيحكي فلسطيني وكان عم يشكل فريق للعمل على خطة

العلاقات العامة تبع حمشو؟

بلشنا من الملف نفسه.

أي ملف PDF بيحتوي على معلومات مخفية عن المستخدم العادي اسمها metadata،

أو البيانات الوصفية بالعربي. حللنا ال-metadata تبع الملف واكتشفنا ما

يلي.

البرنامج المستخدم Microsoft Word.

تاريخ الإنشاء المسجل 21 كانون الأول

2024. يعني بعد سقوط نظام الأسد بـ13 يوم

فقط.

اسم المؤلف مكتوب بالإنجليزي Palestine Forever.

يعني فلسطين للأبد بس مكتوبة غلط. في تفصيل ثاني مهم حصلنا

عليه من ال-metadata تبع الملف وهو المنطقة الزمنية. UTC+3.

هذا التفصيل ساعدنا نحصر البحث بالدول اللي بتستخدم هذا التوقيت وقت تصدر

الملف. سوريا، الأردن، تركيا، السعودية.

ناكشنا الدنيا عليه لأويس.

ما ضل قرنة. سجلات المشافي، الشرطة، السجون،

الإعلام، حتى النعاوي. دورنا على اسمه بالعربي وبتهجئاته

المختلفة بالإنجليزي والمعلومات المنشورة على أشخاص عاشوا بين سوريا

والأردن وتركيا والسعودية، ما لقينا شي.

كيف شخص بيشتغل بالعلاقات العامة ما له أي أثر على الإنترنت؟

بعد أسابيع طويلة من البحث،

بيتواصل معنا مصدر وبيقلّنا إنه ندور على أويس بتركيا.

دورنا بالصحافة التركية ووصلنا لاسم أويس العواودة.

في شي غريب بأويس العواودة لأنه عنده اسم ثاني بتركيا.

فيصل كريم أوغلو. بحسب تقارير تركية، أويس مولود

بالأردن من أصول فلسطينية وحاصل على الجنسية التركية.

وهون بلشنا نرجع بحياته لورا. من 2006 لـ2010 أويس كان

موجود بسوريا، وكان يشتغل بتجارة الرخام على أساس.

بالـ2012 انتقل للبنان وتعرف على شخص كان يستخدم اسم علي أحمد

ياسين.

علي أحمد ياسين كان عامل حاله رجل أعمال بيشتغل مع شركة مقرها

النمسا، بس بحسب المصادر المفتوحة تبين إنه هو جاسوس، كان

يشتغل مع عدة أجهزة استخبارات.

نفس الفترة كان أويس عم يتواصل مع رجل أعمال تركي اسمه محمد

بوداك دريا، اللي كمان بيشتغل بالرخام.

بتاريخ 31 آذار 2013 أويس سافر من لبنان لتركيا،

وباليوم الثاني التقى بمحمد بوداك دريا.

بلشوا يشتغلوا الاثنين مع بعض بتجارة الرخام وتوسعت أعمالهم بين الشرق

الأوسط وأوروبا.

وخلال نشاطه بتجارة الرخام، أويس العواودة طرح فكرة

تجارة وشحن قطع الطائرات المسيرة على محمد بوداك

دريا. الخطة تضمنت الحصول على قطع مسيرات من هونغ

كونغ لبيعها لمهندس تونسي اسمه محمد

الزواري.

إذا الاسم ما مر عليكم قبل، فالزواري كان مهندس طيران تونسي متخصص

بتطوير الطائرات المسيرة،

وكان مشرف على نظام المسيرات لكتائب القسام.

بتاريخ 15 كانون الأول 2016 تعرض محمد الزواري

للاغتيال بإطلاق النار داخل سيارته قدام بيته

بمدينة صفاقس التونسية.

السلطات التونسية أعلنت إنه التحقيقات الأولية أشارت إلى احتمال ضلوع جهة

أمنية بالعملية.

بعام 2018 أويس زار لبنان تلات مرات، ليشتري بطاقات

تعبئة اتصال وأجهزة إنترنت، وكان يرسل أرقامهم

لجهات خارجية.

بالـ2023 رجع أويس على لبنان واشترى 14

SIM Card و10 أجهزة مودم بتوجيه من شخص

اسمه مايكل.

بتاريخ 17 آب 2024 سافر أويس إلى

فرنسا، ومنها انتقل برًا إلى بلجيكا برفقة

مايكل، وهنيك خضع داخل فندق لاختبار كشف

الكذب،

بس ما عرفنا مين الجهة اللي خضعته لهذا الامتحان.

بعد أربع أشهر بنرجع لسوريا وبنرجع للملف اللي بلشنا منه كل التحقيق.

21 كانون الأول 2024. ملف PDF

بعنوان خطة العلاقات العامة.

خطة لتلميع صورة محمد حمشو للرأي العام السوري، عم يشتغل عليها

أويس العواودة.

طيب وينه أويس اليوم؟

بـ6 شباط 2026 الاستخبارات التركية وشرطة مكافحة الإرهاب

بإسطنبول بتعلن تنفيذ عملية أمنية اسمها مونيتوم.

وبتوقف شخصين.

محمد بوداك دريا

وفيصل كريم أوغلو.

فيصل كريم أوغلو اللي بتذكره التقارير التركية إنه اسمه الأصلي هو أويس

العواودة.

ليش اتوقفوا محمد بوداك دريا وأويس العواودة؟ شو التهمة؟

تخابر مع الموساد.

أويس العواودة، الشخص اللي كتب خطة العلاقات العامة وشكل

فريق لإعادة تدوير وتلميع صورة محمد حمشو بعد 13 يوم

من سقوط النظام الأسد، اعتقل بإسطنبول والتهمة هي تخابر مع

الموساد. نرجع ونكرر، أويس العواودة، الشخص اللي كتب

خطة العلاقات العامة وشكل فريق لإعادة تدوير وتلميع صورة محمد

حمشو بعد 13 يوم من سقوط نظام الأسد، اعتقل

بإسطنبول والتهمة هي تخابر مع الموساد.

هاد كان تحقيقنا لليوم. السلام عليكم ورحمة الله

تعالى وبركاته.