مدرسة أحياء عراقية ترد على الهجوم بسبب نقابها بعد محاضرة مجانية

يعني كل هذا الهجوم والتسقيط دا يصير ضدي لأن أني مدرسة منقبة. طبعًا أني مدرسة أحياء سادس علمي، نشرت محاضرة على اليوتيوب، محاضرة مجانية لطلاب السادس بيها شرح المنهج، وإذا بي أتفاجأ إنه أتعرض لهجمة تسقيط بحقي وبحق نقابي. وطبعًا وصلت بيهم مرحلة إنه هما يتهموني بالإرهاب والتطرف لأن أني منقبة، وأني طبعًا ما لي علاقة بهاي الأمور.

أني دا أشرح مادة علمية، دا أقدم مادة علمية، دا أفيد الطلاب، دا أسهل عليهم امتحاناتهم، وأني ما لي علاقة لا بالإرهاب ولا بغيرها، وأني أساسًا والدي عسكري وعمامي شهداء اثنين أنطوا روحهم ودمهم في سبيل العراق، فليش هذا التسقيط دا يصير ضدي وهاي الاتهامات بحقي؟ وأني كل اللي سويته إنه قدمت محاضرة مجانية شرحت بيها منهج الطلاب

السادس، وطبعًا المحاضرة بفضل رب العالمين إنه هي وصلت بيومين مية وأربعين ألف مشاهدة، لدرجة إنه هي صارت trend بالوطن العربي مو بس بالعراق، حتى أكو أشخاص يعني من دول ثانية علقوا لي تعليقات إيجابية، حتى أساتذة بجامعات مصرية علقوا يمدحوا بالشرح اللي أني شرحته، بس إحنا أبناء بلدي للأسف حاربوني. بس هاي الحملة والتسقيط كلها صارت ضدي لأن

يعرفون إنه أني ممكن أأثر على هاي الأجيال القادمة بشي إيجابي، وهم ما يريدون هذا الشي، هم يريدون بس الأشياء السخيفة والسلبية تأثر بهذا الجيل وبهذا المجتمع.

أني أشكر كل الأشخاص اللي دعموني ووقفوا وياي ودافعوا عني بدون ما أني أطلب من عندهم، هذا الشي يكفيني والله العظيم.

وبالنهاية أقول إن لم تستحي فافعل ما شئت