Homemade Bread Baking Tutorial
لو بتخافي تعمليه ليفشل منك، يبقى الفيديو ده معمول لك.
تابعي الطريقة للآخر وانسي إنه يبوظ منك تاني.
أول خطوة هنعملها، هتجيبي معلقة كبيرة خميرة، واتنين معلقة كبيرة سكر،
واتنين معلقة كبيرة دقيق، ونص كوباية مية تكون فاترة.
ونقلبهم مع بعض ونسيبهم على جنب كده حوالي خمس دقايق.
وبعدين هنزل بستة كوب دقيق، وعليها رشة ملح صغيرة، ومعلقة صغيرة بيكنج بودر،
ومعلقة كبيرة سمسم، ومعلقة كبيرة حبة البركة، واقلبي كل المكونات دي مع بعض كويس.
شايفين الخميرة اتفاعلت معانا وعملت فوران إزاي؟ هننزل بيها بقى على الدقيق.
وبعدين هنضيف معلقتين كبار زيت، وهنعجن بلبن دافي، هننزل بيه شوية بشوية لحد ما العجينة تظبط معانا وتلم.
وأهم حاجة العجن كويس جداً، خدت مني حوالي كوبايتين وربع سوايل لحد ما بقت بالقوام التحفة ده، ناعمة وطرية.
دلوقتي هغطيها بكيس بلاستيك وفوطة، ونسيبها في مكان دافي تخمر حوالي ساعة.
شايفين الجمال؟ العجينة اختمرت وبقت زي الفل.
هنقطع العجينة كور صغيرة ونرصها ونغطيها ونسيبها ترتاح عشر دقايق.
وبنفردها لحد ما يكون شكلها مظبوط.
شايفين؟ هو ده السمك اللي احنا عاوزينه بالظبط.
بعد ما خلصنا فرد العيش، هنرصه في الصواني ونسيب مسافات،
ونغطيه ونسيبه يرتاح نص ساعة.
وهنا بقى هنبدأ نسوي العيش، ممكن تسويه على مصفى زي ما أنا عملت كده والنار وسط،
أو تعمليها في طاسة ويكون برضه بنفس طريقة التسوية.
أنا بحب أعملها على المصفى، بحط العيش وأفضل أقلب فيه كل تلات ثواني على كل ناحية.
شايفين؟ العيش بدأ يتنفخ معانا وبقى شكله تحفة.
أول ما ياخد اللون الدهبي الجميل ده بنرفعه من على النار ونحط غيره، ونكرر نفس الخطوة مع باقي كمية العيش.
شايفين الجمال واللون الدهبي التحفة؟ كفاية ريحة الخير في البيت، أنضف وأحلى من الجاهز مليون مرة.
قولوا لي في التعليقات بتحبوا تخبزوا العيش في البيت ولا بتشتروه جاهز؟ ومن أي بلد بتابعوني؟
End of transcript · 283 words
