خطط الطوارئ الأمريكية والبريطانية: 90 يوماً للقواعد و72 ساعة للسكان

أمريكا بتنشر تحذير لكل قواعدها. اعتمدوا على نفسكم لمدة 90 يوم من غير لا مية ولا أكل ولا كهربا ولا وقود ولا حتى اتصالات. وفوكس نيوز اللي هي أقرب قناة لدونالد ترامب، سمت الخطة بالحرف خطة يوم القيامة.

وبعدها على طول نلاقي إن بريطانيا بتعمل نفس الحملة، ولكن بتسميها المرة دي Be Ready.

يعني خليك مستعد. وحضروا شنطة فيها أكل ومية تكفيكم لمدة قد إيه؟ تلات أيام.

ده مش كلامي، ده كلام وزير الدفاع البريطاني بن والاس.

اللي طلع بعديه على طول وقال يا جماعة ما تقلقوش، مفيش أزمة.

طيب لو مفيش أزمة ليه فيه مصانع خاصة في أمريكا مش تبع الدولة بقت بتتجهز دلوقتي عشان تتحول لإنتاج حربي.

والأغرب من ده كله إن كل ده بيحصل قبل الانتخابات النصف الأمريكية بـ8 أيام. أنا زي ما بقول ما بأومنش بالصدفة في السياسة، فهربط لك الحكاية دي كلها في كام دقيقة.

والمصادر كالعادة هتلاقيها موجودة تحت في الكومنتات عشان المصداقية. القصة بتبدأ يوم 30 سبتمبر.

المذكرة اللي قلت لكم عليها اضطمدت من وزير الحرب الأمريكي بيت هاجستيس، واتبعتت في سرية تامة للقواعد الأمريكية لحد ما اتسربت يوم 25.

ومش أي حد سربها، دي فوكس نيوز اللي هي شبكة أخبار الوحيدة اللي دونالد ترامب بيقول عليها أهل ثقة، وهو اللي بيديها تصريحاته بنفسه.

الأغرب في الموضوع هو تاريخ نشر التفاصيل دي كلها.

زي ما قلت إن هو قبل الانتخابات النصفية بكام يوم. حسب الوثائق اللي فوكس نيوز اتكلمت عنها إن كل قاعدة في أمريكا لازم تقدر تعيش 3 شهور لوحدها. كهربا بتاعتها من غير ما تاخد من شبكة الدولة، مية من غير ما تعتمد على شبكة الدولة،

ويكون عندها وقود أو بنزين متخزن، وطريقة تقدر تتصل بيها ببعض لو الأقمار الصناعية اتشوش عليها. طب ده إزاي؟ عن طريق مفاعلات نووية صغيرة متنقلة، أو زي ما كان مكتوب huge power banks أو يعني power banks متنقلة. ده غير إن يكون عندهم قطع غيار وأدوية. أي حاجة لازم تكون ليها مش مصدر واحد،

مصدرين. ده اللي كان مكتوب في التقارير أو في الوثائق السرية اللي اتسربت.

من ضمن الخطة اللي اتسربت هي خطة المصانع اللي قلت لكم عليها في الأول.

حاجة اسمها شبكة التصنيع الاحتياطي المدنية.

يعني إيه؟ يعني زي ما فيه مصانع تابعة للدولة، ففيه مصانع خاصة.

المصانع الخاصة دي دلوقتي بتعمل لها عقود ومواصفات حماية من cyber attacks أو اللي هي الهجوم السيبراني، عشان لو جت عليها الأزمة دي تتحول في أيام وتقدر تعمل سلاح وقطع غيار للجيش، ويتعمل لها تدريبات دورية.

ولكن السؤال الأهم دلوقتي، التقرير ده سري، طب أوروبا عرفت إزاي؟

اللي حصل يوم 23 أكتوبر مش جديد. بريطانيا قالت للناس بتاعتها 3 لتر مية للفرد في اليوم، أكل معلب وكشاف وبطاريات وكاش يكون ورق مش على الموبايل وبالكروت والكلام ده كله.

قبليها بشهر بقى نفس وزير الدفاع ده قال إيه؟ قال إن خطر روسيا أصبح أكبر من أي وقت قبل كده، وإن أوروبا سابقانا في الموضوع ده، لإن الاتحاد الأوروبي كله في مارس 25 طلع بيان إن كل مواطن يبقى عنده أكل ومية لـ72 ساعة.

لدرجة إن هولندا والسويد والنرويج طبعوا كتيب للناس بالكلام ده. ألمانيا بقى قالت لناسها قد إيه؟ قالتلهم 10 أيام.

يعني الرقم بيكبر كل ما بتقرب من روسيا. أوروبا فهمت حاجة إحنا دايما بنقولها من زمان، وهو المتغطي بالأمريكان عريان. لما أمريكا نفسها بتجهز قواعدها عشان تعيش من غير الدولة، أوروبا لازم تجهز ناسها عشان يعيشوا من غير أمريكا، لإن ده سيناريو لوقت ما حدش هينفع فيه حد.

هتقول يا وائل هل ده استعداد لحرب برة أمريكا؟

هقول لك لأ، ده استعداد لحرب ممكن توصل لجوة أمريكا كمان.

وده مش مجرد كلام. ليه؟ لإن أي عدو هيضرب، هيضرب المرافق العامة في الأول.

هيضرب المرافق العامة بتاعة البلد قبل ما يضرب الجيش، زي المية والكهربا وشبكات الاتصالات، عشان يشل البلد اللي بيهجم عليها.

هتقول يا وائل هل ده دليل إن الحرب خلاص هتقوم وما بين مين ومين؟ أنا شايف إن الخطة دي مش دليل إن الحرب هتقوم بكرة، ولكن دي دليل على إن اللي بيحكموا العالم ابتدوا يفترضوا إنها جاية خلاص وبقت في الحسبان.

وخد بالك من الفرق. لحد من سنة فاتت كان الكلام ده كله بيتقال في مراكز الأبحاث بس، يعني كلام وحتى مش على ورق.

ولكن دلوقتي بقيت تقال في مذكرات رسمية وفي كتيب يتوزع على الناس.

يعني الموضوع نزل من فوق لتحت، من نظرية بتتقال من الجنرالات للناس. وليه دلوقتي؟ عشان الخيط كله مربوط. أسعار بترول قاعدة بتزيد، سلع أسعارها بتزيد، ناس مش قادرة تستحمل، حكومات وناس بتعاني وصلت لمرحلة تحمل مش هيقدروا يكملوا عن أكتر من كده. ده اللي كنت بقوله من زمان.

العالم مش هيستحمل كتير، وأمريكا نفسها اللي بتقول للعالم اهدوا، بتحضر نفسها في نفس الوقت لسيناريو 90 يوم.

يعني اللي بيقول لك ما تقلقش، أنا قاعد معاك بيحضر شنطته وانت مش واخد بالك.

وآخر حاجة بداية الأزمة ما جتش من قفل مضيق هرمز، بداية الأزمة جت من أكتوبر، من كام سنة من اللي بدأ يحصل لإخواتنا، ومش من كام سنة بس، ده من 1948، 78 سنة، وإخواتنا بيعانوا. واللي إحنا بنتكلم فيه ده مجرد رفاهية بالنسبة للي هما بيشوفوه كل يوم. عقلك وتفكيرك أغلى بكتير من إن أي حد يوجههم، هتلاقي المصادر موجودة تحت،

ادخل اقرأ، ادخل دور، ادخل شوف، ما تنساش تعمل لايك وشير للفيديو، وأشوفكم في فيديو تاني. شكرًا.